抗外判黑衣默站送淫媒早日歸天

壹淫媒大樓尋日認真熱鬧，一群黑衣人聚集於大樓外默站，個個哭喪咁嘅樣，唔知嘅，仲以為入錯殯儀館添，莫非信上帝嘅漢奸黎蒙主寵召？

原來係咁嘅，嗰群黑衣人其實係壹淫媒員工，因為抗議「假自僱、真裁員」外判方案，發起黑衫默站十五分鐘喎。成個活動雷大雨小，現場得二百人咁大把，說好嘅讀者支持、大學生聲援連影都冇，唯一比較矚目嘅係，走狗記協同傳聞有份收黑金嘅政客終於蒲頭，係咁意遺憾嚇壹淫媒，之但係做戲又唔做全套，對於漢奸黎個衰名始終隻字不提，想點先？

好簡單，天下沒有免費嘅狗糧，記協及政客不嬲係漢奸黎豢養嘅走狗，吠人哋就賣力咯，要佢哋掉轉槍頭鬧自己主子喎，畀個天做膽都唔敢，就算心中有一萬個不滿，頂多都係默站嘅咋。最好笑係，記協頭頭仲著到紅當當現身，萬黑叢中一點紅咁款，到底係攞景定贈興，佢自己至知咯。

話時話，默站呢條爛橋唔知邊個諗出嚟，正宗有姿勢冇實際，漢奸黎驚你有牙，會跪低至奇，被網民恥笑為「鳩站」就係咁解。係人都知，對付呢挺無良僱主，「和理非非」邊行得通o架，梗係要搞大佢啦，呢，漢奸黎當日煽動佔領咪好耍家嘅，家陣係時候以其人之道還治其人之身，整番鋪違法達義，讓愛與和平佔領壹淫媒大樓，讓愛與和平光復漢奸豪宅，總之契弟一日唔跪低，員工一日唔罷休，咁至係正路吖嘛。

想當初呢班員工同漢奸黎打生打死，不惜助紂為虐企喺反中亂港最前線，點知有人打完齋唔要和尚，當班員工係廁紙咁用完即棄。所以話啫，你做初一，我做十五，壹淫媒員工就算唔夠薑玩佔領，起碼都搵班和尚打嚇齋，請班道士唸嚇經，當諷刺又好，出氣又好，送淫媒歸西更好，起碼夠曬台型，總好過粒聲唔出「鳩站」吖。

再唔係，搵黃衞兵教路，用「抹黑」金紫荊花雕塑嘅方式，「抹黑」爛果報招牌。仲有喎，職工盟阿頭同成班反對派政客，平時開口埋口關注打工仔權益，家陣呢個道德高地點可以輕易錯過吖，一於好似當年發動碼頭工人大罷工咁，最好請埋國際工會組織聲援，一個唔該畀漢奸黎最崇拜嘅特朗普睇到，話唔定會科水畀佢搞番掂筆蘇州屎添。

嗱，橋就講曬嘞，淫媒員工捉到鹿識唔識得脫角，就要靠自己造化。講真，今日漢奸黎可以對一班忠心耿耿嘅夥記反麵無情，他朝一樣可以對自己豢養嘅走狗打手反轉豬肚，甚至整鑊香肉煲嚟歎都話唔定，為人為己，都要頂硬上呀！

原文地址：http://orientaldaily.on.cc/cnt/news/20170706/00190_001.html